Kommunit nalunaarsuiffiannit tigusat

Isumaginninnermut nalunaarsuutit tunngaviusut kommunit nalunaarsuiffianninngaanneerput. Nalunaarsuutit Kommunit akuerisaannik KIMIK IT A/S-imit tiguneqarput. Isumaginninnermut naatsorsuutit allattorsimaffiat aammalu nalunaarsuutit tunngaviusut qulequttani tulliuttuni taaneqartut Datatilsynet-mit akuerineqarlutik nassuiarneqarput.

 

Uuttuutit tigussaasut

Isumaginninnermut tunngasuni naatsorsuutini uuttuutit pingaarnerit tassaapput:

 

·       Inuup normua

·       Ikiorsiissut (ikiorsiissutip suunera aammalu aningaaserivimmi konto normu)

·       Ikiorsiissutit tigunerini ulloq (ulloq, qaammat aammalu ukioq)

·       Ikiorsiissutit annertussusaat (aningaasat amerlassusaat koruuninngorlugit)

 

Kisitsisitigut paasissutissat aaqqissuunneri

Nalunaarsuutit tunngaviusut allaffissorluni nalunaarsuiffinninngaanneerput, kisitsisitigullu paasissutissiinermut atortussiatut ineriartortitaanatik, taamaattumillu nalunaarsuutit tunngaviusut suliareqqillugit misissorlugillu suliaapput.

 

Nalunaarsuutinik misissuineq

Ikiorserneqarsimasut allattorsimaffianni ilaasut ikiorserneqareernerup kingorna ikiorsiissutinik utertitsisimasut (ikiorsiissutigineqartunik taarsiisimasut), kukkunermilluunniit allattorsimaffimmiittut naatsorsuutinut ilaanngillat. Inuup normui atorsinnaanngitsut nakkutiginnilluni misissuinermi peerneqarput. Kommunit naatsorsuutaannit aammalu kommunini tapiissutigineqarsimasut naatsorsuutaannit uani saqqummersitami annikitsumik allaanerussuteqartoqarnera nalunaarsuutinik atorneqartunik misissuinerup takutippaa.

 

Kommunit naatsorsuuseriviini kisitsisinilu paasissutissani saqqummiunneqartuni ikiorsiinerit ukiup siuliani pisut ilaasinnaapput; soorlu ikiorsiinerup pereerneratigut akiliinerit akinut malittarisassaliorsimanerup kinguneratigut pisimasut, taamaattumillu aningaasat amerlassusaat akinik malittarisassaliorsimanerup kingunerisaanit ikiorseereernermi akiliisimanertut nalilersukkat 500 kr.-it ataallugit annertussusillit piaarneqarput. Pisortanit ukiup ingerlanerani ikiorserneqarsimasutut naatsorsuinermi 500 kr.-nik anginermilluunniit ikiorserneqarsimasut naatsorsuutini killigititaapput, suliffeqanngikkallarnermilu aammalu ernereernermi ullormusianut il.il 1.000 kr.-it killigititaallutik.